The Ultimate Vampire Resource and Directory

My curse upon your venom'd stang,

That shoots my tortur'd gums alang,

And thro' my lugs gies mony a twang,

Wi' gnawing vengeance;

Tearing my nerves wi' bitter pang,

Like racking engines!



When fevers burn, or ague freezes,

Rheumatics gnaw, or colic squeezes;

Our neighbour's sympathy may ease us,

Wi' pitying moan;

But thee-thou hell o' a' diseases!

Aye mocks our groan.



Adown my beard the slavers trickle,

I throw the wee stools o'er the mickle,

As round the fire the giglets keckle

To see me loup;

While, raving mad, I wish a heckle

Were in their doup.



O' a' the numerous human dools,

Ill hairsts, daft bargains, cutty-stools,

Or worthy friends rak'd i' the mools-

Sad sight to see!

The tricks o' knaves or fash o' fools,

Thou bear'st the gree.



where'er that place be priests ca' hell,

Whence a' the tones o' mis'ry yell,

And ranked plagues their numbers tell,

In dreadfu' raw, Thou.

Toothache, surely bear'st the bell

Amang them a'!



O thou grim mischief-maqking chiel,

That gars the notes of discord squeal,

Till daft mankind aft dance a reel

In gore a shoe-thick;

Gie a' the faes o' Scotland's weal

A towmont's Toothache!